Aruba lo sali mas duro cu nunca dilanti


26 di november pueblo di Aruba completo a recorda cu 34 aña pasa nos gran libertador Betico Croes a fayece. Pero hamas pueblo no por y ni mag di lubida lucha cu su persona a hiba sacrificando su famia pa bringa pa e felicidad di su pueblo. Den e lucha pa Status Aparte di 1983 pa 1985 nos libertador a traha cu alma y cuerpo pa prepara Aruba pa por ta un pais autonomo den Reino, maske su opositornan, manera tabata e caso tambe durante referendum, tabata encurasha hendenan pa bay lama y pa no haci uzo di nan derecho di voto. Pero asina mes Betico a logra. Den e mesun periodo di 1983 pa 1985 su opositornan a sinta sembra odio y venganza contra su persona cu a conduci cu su partido a sali e partido mas grandi den eleccion y su persona cu mas cu 10.000 voto. Asina mes el a logra, mientras su opositornan a sinta sembra odio y vengansa y cu hamas a hiba e lucha pa nos Status Aparte a forma e prome gobierno di pais Aruba sin niun tiki cuero di cara.


Opositornan hamas a para pa Status Aparte

Ora cu prome di januari 1986 nos Himno a resona pa prome biaha ofialmente y nos bandera a bay halto simbolisando Aruba como pais autonomo, e arkitecto di e lucha mes tabata luchando pa su bida. E opositornan cu hamas a hiba e lucha y nunca tabata kere den nos Status Aparte tabata esnan cu sin cuero di cara tabatin nan boca yen cu Status Aparte y ta esnan cu a bira e prome gobernantenan di Aruba como pais. Nan ta e prome gobernantenan cu hopi te dia di awe ta sinta critica pero ta esnan cu ta cobra hasta pensioen di minister y tambe acumulativo pensioen di parlamentario. Ta danki na e lucha di Betico pa logra pa Aruba ta un pais riba su mes cu nan ta goza keto bay di e lucha aki. Lamentablemente e prome gobernantenan aki den corto tempo a sa di pone Aruba su nomber riba panorama di corupcion, lasonan cu mafioso y gruponan grandi di narcotraficanetnan. Sigur nos mester tuma como ehempel e caso di Plant NV unda cu e gobierno a bin cu un grupo di mafia Italiano, unda cu pa un acuerdo dudoso Aruba mester a paga pa 15 aña un debe. E acuerdo dudoso aki a laga un ruina cu danki na e Partido di Betico esta MEP lidera pa Nelson Orlando Oduber a percura pa por a haci di e ruina aki algo positive awendia unda nos por wak e vision di MEP di a bin cu un cadena hotelero manera Marriott cu a contribui enormemente na crecemento di nos economia y sosten enorme na nos unico pilar economico cu ta nos turismo


“Si mi cay na caminda, gara e bandera y sigui cu e lucha”!

Un biaha mas Aruba ta na e momento di como pais nos tin di gara e bandera y sigui cu e lucha pa conserva nos Status Aparte pero sigur pa percura pa felicidad di nos pueblo den su totalidad. Lastimamente un biaha mas historia ta ripiti unda cu esnan cu nunca a hiba un lucha pa nos Status Aparte, hamas a hiba un lucha pa nos tin nos mesun bandera , nos himno, nos moneda , awe ta sembra un biaha mas odio y vengansa den un periodo cu Covid a mustra nos cu nos mester haci cosnan diferente. Mas tristo ta cu e opositornan politiconan aki cu ta sembrando odio, vengansa y division den pueblo ta e mesun cu a pone nos Status Aparte y felicidad di nos pueblo den peliger ora cu di 2009 pa 2017. Nan a percura pa endeuda nos pais sin misericordia, a haci mal uzo di placa den tur companianan estatal, a bin cu CITGO cu a crea mas desempleo y speransa falso, y sigur un vision berde cu mester a crea 1600 cupo di trabao y esaki hamas a pasa. Loke si a pasa ta hopi gastamento di placa na un bus electronico, un trip di boto di Wubbo Ockel costando miyones, Richard Branson y Al Gore a costa pueblo algun miyones, contractnan lucrativo na Phillips pa pega algun bombiyo y asina por sigui e mal uso di fondonan di pueblo cu awo cu Covid a dal pueblo y pueblo por wak si no a hiba un maneho asina malo financiero y probecho personal manera cu sr Richard Arends cu su a probecha di saca rond di 5 moyon florin, awendia nos pueblo por tabata fuerte para.


Pesey sigur ayera nos gran libertador ta recorda nos y duna nos e forsa pa nos tuma decision firme y corecto y contrario na loke nos opositornan kier cu ta destruccion di nos pais. Nos como gobierno y Parlamento a escoge na un manera firme pa bienestar di nos pueblo y sigur pa nan felicidad manera Betico tabata anhela. Y sigur un di e decicionan cu a ser tuma na un manera firma tabata e escogencia pa firma e acuerdo cu Hulanda, unda nos a escoge pa no kibra nos pais, pero pa restructura nos pais y hasi esaki mas fuerte y sigur mas fuerte cu den futuro nos por ta prepara pa wanta calke sla y sigur asina nos ta reinforsa nos Status Aparte y hasi esaki mas fuerte ainda. Pesey di awo nos ta urgi e pueblo di Aruba pa uni na e lucha aki cu no ta uno pa beneficioso di un Partido politico pero e lucha aki ta na beneficio di e pueblo di Aruba y hamas nos por permiti pa storia ripiti paso pueblo sa caba kico ta spera nan si partido AVP mester bin un biaha mas.



5 views0 comments

©Bo Informado