Aruba a perde un gran deportista. un atleta legendario y excepcional, Eddy Ras


Cu hopi tristesa mi a ricibi e noticia lamentabel cu mi coach di tennis, e legendario Eddie Ras a fayece den e fin di siman aki. Sigur un noticia hopi tristo pa deporte en general y deporte di tennis en particular.

Eddie Ras tabata mi coach desde cu mi a cuminsa hunga tennis. E tabata busca mi tur merdia 2’or y mey pa nos bay train na hotel Golden Tulip. Pa añanan largo el a haci esaki. Alabes mi a viaha hopi cu Eddie pa participa na torneonan of diferente tennis camps.

Eddy Ras no a resalta solamente den e deporte di tennis pero den su hubentud e tabata hopi activo tambe den e deportenan futbol, softball, baseball, basketball, judo y tennis di mesa.

Pa loke ta futbol, Eddy Ras a hunga den hoofdklas pa Aruba Juniors y despues pa RCA y cu e ekipo aki el a logra obtene varios e titulo di campeon di futbol. Tambe el a hunga pa e seleccion Arubano y Antiano durante e Weganan di Reino na Hulanda y Surnam.

Den e deporte di baseball Eddy a hunga pa Little League Oso Grape. El a promove pa Junior League hungando pa e ekipo Kodak y despues a sigui pa A Klas y Double A formando parti di e ekipo Marlboro. Den tur e categorianan menciona el a forma parti di diferente seleccion y tambe pa e campeonatonan Antiano.

Den softball el a hunga pa e ekipo Aldo Travel y a logra varios titulo di campeon Arubano y Antiano. Tambe el a forma parti di e seleccion nacional di Aruba.

Pa loke ta basketball, Eddy a hunga pa Aruba Jrs y RCA den A Klas. Tambe el a forma parti di e seleccion nacional di Aruba. El a hunga contra ekiponan conoci manera China Little Devils di Surnam, Sithoc di Corsou, Pasadena College, seleccionnan di Corsou, Venezuela y Puerto Rico.

Den e deporte di judo, Eddy a train bao guia di Ramon Sharpe, un figura legendario den e deporte di judo na Aruba y tambe Carlos Bislip. El a termina su carera obteniendo su faha preto den judo. Tambe el a forma parti di e seleccion nacional di judo, pero pa motibo di un lesion, e no por a sigui pa forma parti di e seleccion pa e Campeonato Mundial na Winnipeg, Canada.

Eddy Ras a practica un gran cantidad di deporte, pero finalmente el a scoge pa e deporte di tennis, cu a forma tambe su carera di bida. Como hoben caba el a gana e titulo maximo di Aruba. Eddy a eherce e deporte aki na un forma excelente y tabatin varios titulo riba su nomber, tanto den e categorianan singles, doubles y mixed doubles. Durante hopi aña Eddy tabata domina como nr.1 den tennis na Aruba y tambe den diferente categoria Antiano. Ya na un edad di 17 aña Eddy a forma parti di e seleccionnan di Aruba y Antias.

Eddy ta e unico tenista Arubano hunto cu su partner den tennis Hans Henriquez cu a logra obtene e Campeonato Antiano den e periodo cu Aruba tabata forma parti ainda di e constelacion Antiano. Tambe e tabata trainer di e seleccion hubenil di Aruba cu den total a logra 11 titulo Antiano y diferente titulo den exterior. El a guia e seleccion Arubano na e weganan di cualificacion pa e Weganan Olimpico na Spaña. Como trainer Eddy Ras a forma parti di e staf di Nick Bolletierri, un trainer di fama mundial. Alabes e tabata scout pa Chris Evert Tennis Academy na Fort Lauerdale, Merca.

Eddy Ras tabata director di Eagle International Tennis Academy. Como trainer Eddy a guia diferente alumno cu nan scholarship na Merca. E ta wordo considera como un di e miho tenistanan cu Aruba a yega di produci, un deportista all around y un atleta excepcional.

Mi ta considera Eddy Ras un persona amable, un persona cariñoso y un hende cu a siñmi hopi disciplina y a guia mi den e deporte di tennis. Un mihor trainer cu Eddie pa mi no tabata existi.

Den nomber di Ministerio di Deporte, mi ta gradici Eddie Ras pa tur su dedicacion na deporte di Aruba y cu Dios dun’e sosiego eterno. Forza y condolencia na su señora Oneida, yiunan Eduard, Natasha y henter famia.

Eddy, un biaha mas, masha danki pa tur loke bo a haci pa deporte na Aruba.