Apertura “no oficial” di MFO Shelter (shelter multifunctional) y lansamento di logo y nomber nobo:

Fundacion Contra Violencia Relacional


Den pleno siman di e campaña Orange 2020, den cual ta traha riba conscientisacion contra violencia, e Fundacion pa nos Hende Muhenan den Dificultad a organisa un apertura “soft” di nan shelter nobo cu ta acapara 16 unit mas acerca di locual nan tin, cu ta facilita cu por yuda mas cliente.

Hunto cu e apertura no oficial di e Shelter Nobo a lansa nan nomber y logo nobo den e luna den cual e fundacion ta cumpli 25 aña di existencia. Fundacion Contra Violencia Relacional ta e nomber nobo di Fundacion pa nos Hende Muhenan. Sra. Audrey Croes a duna un presentacion di e logo nobo y a splica di e cambio di nomber.

Na e ocasion aki a yama Sra. Dora Koolman Croes, Dama Protectora y Fundadora di e Fundacion danki y a entregue un bouquet di flor como muesta di aprecio. A dedica un danki special na tur e miembronan di e fundacion durante tur e añanan. Un danki special a bai pa Sra. Yvonne Spellen cu tabata presidente di e fundacion desde comienso (1995) te cu 2016 ora ela baha. Sra. Suzy Kock, Presidente di e fundacion a duna un speech den cual ela gradici un y tur cu a haci e soño pa por cumpli cu e “Verdrag van Instambul” na unda Aruba no solamente ta cumpli cu e rekesitonan internacional pa loke ta maltrato relacional. Na e ocasion aki a presenta e presidente di e Fundacion bou nomber di Fundacion Contra Violencia Relacional Sra. Audrey Croes.

Sra. Magaly Maduro, coordinadora di e awor yama Fundacion Contra Violencia Relacional a duna esnan presente un recorido di e lugar conforme protocolnan di Covid y a expresa su alegría cu e ta wak e unitnan bira un realidad cu tin posibilidad pa yuda mas hende awor. E proyecto aki tabata posibel cu ayudo financiero di Hulanda via e MInister di Binnenlandse Zaken Knops cu a coopera pa realisa esaki.

E invitadonan a consisti di e Minister Presidente di Aruba, Evelyn Wever Croes, Minister di Asuntonan Social, Sr. Glenbert Croes, representantenan di Hulanda na Aruba VNO, miembronan di Directiva y empleadonan di e Fundacion.


44 views0 comments