APERTURA DI EXPOSICION HISTORIA DI PAROKIA DI NOORD


Diasabra ultimo, Prome Minister Evelyn Wever-Croes a presenta na e exposicion “Historia di Parokia di Noord” na unda el a haya e oportunidad pa hiba palabra. E exposicion a keda realisa despues di un limpiesa cu a tuma luga na Misa di Noord cu ayudo di algun boluntario. Entre nan tabatin un hoben cu tin hopi aña trahando como misdienaar y tambe ta catekista den Parokia di Noord. Awe Steve Geerman ta Presidente di Fundacion Kapel di Bethania.


E exposicion tin un balor historico, cultural y social hopi grandi pa e Parokia di Noord, pero e forma con henter e proyecto a desaroya tambe ta di suma importancia. Na prome luga nos ta papia aki di un consciencia cultural historico di e hoben Steve Geerman na prome luga, pero tambe di Pastor Santiago y tur otro parokiano cu a yuda Steve su soño bira realidad.


Mi ta sigur cu ora Steve a cuminsa haci e zolder na Misa di Noord limpi den vakantie grandi e aña aki, e nunca a pensa cu e descubrimento ey lo bira algo asina grandi y asina bunita. No solamente pa e parokia di Noord, pero tambe pa henter e pueblo di Aruba.


Fundacion Kapel di Bethania ta expone un cantidad grandi di artefactonan cu Steve a logra scapa di bay tira afo y conserva nan. Pero tambe un cantidad di artefacto- y potretnan cu parokianonan a pone disponibel pa e fundacion por comparti nan historia hunto cu nos. E coleccion ta mustra nos e rol importante cu e Zusternan di Bethania a hunga den educacion y expresion artistico di hobennan na Aruba. Entre otro na Noord tabatin un zuster cu tabata masha stima y cu tabata bishita masha hopi famia riba su bais cu te ainda a keda conserva y cu nos por mira tambe den e exposicion. Ta trata aki di Zuster William, kende tabata dirigi e koor di Misa di Noord.


“Mi kier finalisa bisando masha masha danki na tur hende cu di un forma of otro a contribui pa por conta e historia di Parokia di Noord y cu den futuro e Kapel aki por bira un centro di exposicion, educacion y documentacion manera cu e fundacion ta desea.


Tambe mi kier yama un danki special na Steve Geerman y Pastor Santiago, kendenan den un tempo record, hunto cu un team special a logra habri e exposicion awe y alabes a bini cu e idea pa haci esaki un exposicion permanente den forma di un museo. Parokianonan di Noord boso por ta orguyoso di Museo Kapel di Bethania den futuro. For di awor mi ta desea boso masha pabien cu un museo di historia Christian na Aruba”, Prome Minister Evelyn Wever-Croes a expresa den un discurso cortico na e apertura Exposicion Historia di Parokia di Noord.

3 views0 comments

©Bo Informado