A base di proyeccion Aruba su recuperacion di Turismo ta sigui bay den bon caminda


Dialuna 23 di november Ronella Tjin Asjoe - Croes, CEO di Aruba Tourism Authority (ATA) a presenta update di e situacion na Aruba den cuadro turistico, despues di re-apertura di Aruba su frontera cu a tuma luga na luna di juli.


Cifranan incluyendo luna di october 2020 compara cu aña pasa, ta ilustra cu Aruba ta na un caida di 68%. Esaki ta den margen cu e cifranan cu a proyecta pa e aña aki, caminda cu a pronostica cu Aruba lo por cera e aña cu un caida di entre 60% cu 70%, compara cu aña 2019. Locual ta remarcabel ta e grado di satisfaccion di nos bishitantenan. No ta facil awendia pa tuma e decision pa biaha, y no ta facil tampoco pa pasa den e proceso di biahe. E ta tuma extra esfuerso di cada biahero. A tuma nota a base di analisisnan mensual caminda cu ta revisa mas di 100 “review sites” (entre otro: Trip Advisor), cu den e ultimo lunanan desde re-apertura, cu Aruba ta score un 9 y e cifra maximo ta 10. Mientras cu prome cu COVID e grado di satisfaccion tabata 8.9, cual ta mustra cu e grado di satisfaccion awor ta mas halto cu locual cu tabatin prome cu COVID. Esaki mester sigui mantene y alabes lo sigui monitor e desaroyo.


Pa 2021, drentando temporada halto, e grado di recuperacion lo continua a base di proyeccionnan y esaki tambe ta e meta. Ta spera cu eorey Aruba lo por ta ricibiendo entre 25% y 65% di locual cu Aruba a ricibi na 2019. E scenario optimista ta, cu Aruba ta ricibi 60% di locual cu a ricibi na 2019.

E cifranan aki ta encera esnan cu ta bishita cu avion, pa turismo crusero tin otro proyeccion.

Locual a bin ta haci y cual ta yuda, conhuntamente cu mas flexibilisacion. Ta sigui cana e caminda pa recuperacion economico pa cual a anuncia varios paso ultimo simannan. Locual lo yuda e restante di 2020, ta e re-apertura di e mercado di Latino America otro siman y ta proyecta cu pa december e lo por genera un total di entre 2000 - 2500 bishitante for di e region aki. E otro paso clave y logro cu a anuncia siman pasa ta, e cambio di e color di codigo di Aruba den e mercado Hulandes. Dibiaha a lansa un campaña cu e color geel, cual kiermen ( a base di calculacion ) cu nos por ta ricibiendo entfre 1800 - 2000 bishitante for di e mercado Hulandes pa e restante di e aña aki. Esaki ta yuda cu e grado di recuperacion, cual lo por yuda cu e grado di recuperacion (enbes di 32%, pa 35% compara cu 2019).


Segun diferente investigacion, Aruba ta keda sigur den demanda cerca biaheronan di Merca. Un analisis di siman pasa ta indica cu Aruba ta den top 4 di destinacionnan den Caribe, pa unda Mericanonan lo ta biahando den e proximo lunanan. Pues e potencial ta sigui tey y mester percura pa captura esaki debidamente. Tin algun aspecto cu ta monitorea di cerca cual un di nan ta, cu e casonan positivo na Merca tambe a sigui subi. Aruba ta sigui mantene su mes na un maneho di 100% test pa bishitante. Esaki ta trece cu ne cu algun biahero ta dicidi di cancela nan biahe, mirando e situacion na nan Pais. Un otro punto tambe importante pa menciona cual ta tipifica cosnan cu ta sigui cambia ta cu, CDC cual ta e ekivalente di DVG na Merca, a cambia e nivel di risico di tur e Paisnan cu nan tabatin anteriormente den categoria 3 (esun mas beneficioso ta categoria 1). Aruba tambe ta cay den categoria 3 y ayera nan a cambia nan categorisacion y pues tur cu tabata cay den categoria 3 awor ta cay den categoria 4. Esaki ta algo cu ta monitorea y traha riba dje pa keda informa autoridadnan concerni di e progreso positivo na Aruba. Pa asina cambia e categoria di riesgo pa Aruba yh beneficia di esaki mescos cu a bin ta haci den otro mercadonan.


Ademas lo sigui cu diferente campaña, manera e “One Happy Workaction”, haciendo uzo di e tendencia cu hopi hende ta trahando na cas. E campaña ta encera cu enbes cu bo ta sinta na cas y traha, por haci esaki den hotel, riba beach of otro sitionan rond Aruba. Te cu aworaki si tira un bista, teniendo na cuenta cu a lanza e campaña na september. Entre september y october a ricibi 1000 persona cu a biaha pa Aruba cu e proposito aki, haciendo uzo di e beneficio aki. Pues na luga di ta na cas sinta, ta bin Aruba y sinti sigur na Aruba disfrutando di tur locual Aruba ta ofrece. Esaki sigur ta un bon desaroyo y 30% di esnan cu a bin cu e proposito aki ta keda na hotel, 30% na timeshare y 30% na otro acomodacion. Pues e ta sigur duna beneficio na diferente area di nos economia.


Por ultimo, ta aplaudi e comportacion cu ta mira di parti comunidad y sigur sector comercial. Por nota cambio desde september y ATA como autoridad cu ta forma parti di e crisis team, sigur un di e metanan ta pa sigui cu e control y supervision. Pa wak pa keda skerpi y no dal pasonan atras. Si tur cos bay segun planificacion lo bay ta ricibiendo mas turista cual ta nifica cu lo ta importando mas caso. Te cu aworaki ta mira un elevacion leve di casonan di no residente, pero e meta ta keda pa mantene casonan bou di residentenan y bishitantenan bou control. Cu e informacion aki ta spera di a duna un imprecion di con e recuperacion ta andando, esfuersonan cu a bin ta lanza, resultado di comportacion local cu ta yuda stimula e recuperacion y algun punto cu ta sigui monitorea mirando cu e situacion ta uno cu ta sigui cambia.


17 views0 comments